Maðurinn sem þyrla gat ekki sótt enn á sjúkrahúsi...

Maðurinn sem slasaðist er bíll fór út af vegi undir Eyjafjöllum í gær er enn á sjúkrahúsi. Í samtali við fréttastofu segir Oddur Árnason, yfirlögregluþjónn lögreglunnar á Suðurlandi, að maðurinn hefði þó reynst minna slasaður en litið hafi út í upphafi. Fjallað var um það í gær að flytja þurfti manninn með landleið á sjúkrahús í Reykjavík, þar sem þyrla Landhelgisgæslunnar var ekki til taks.

Ásgeir Erlendsson, upplýsingafulltrúi Landhelgisgæslunnar, sagði í samtali við fréttastofu í gær að enginn flugstjóri hefði verið á vakt í dag vegna veikinda og ekki hefði tekist að fá flugstjóra á frívakt í staðinn. „Því gat þyrlusveitin ekki sinnt þessu útkalli,“ segir Ásgeir. Hann segist ekki vita til þess að það hafi gerst áður.

Sjá einnig:Engin vakt á þyrlu Gæslunnar í dag

Fram hefur komið í fréttum að sífellt erfiðara hafi verið að manna vaktir á þyrlum Gæslunnar, en flugmenn þeirra og flugstjórar hafa verið án kjarasamnings í á þriðja ár. Spurður hvort það ástand sem nú er uppitengist kjarasamningum segir Ásgeir engar vísbendingar hafa um það.

Dómsmálaráðherra segir þetta óboðlegt og vill fjölga þyrluflugmönnum Gæslunnar.Hann bendir á að í fjármálaáætlun sé gert grein fyrir þörf á að auka fjármagn til Gæslunnar svo hægt sé að fjölga vöktum úr sex í sjö.

Sjá einnig:Dómsmálaráðherra segir ástandið ótækt og boðar fjölgun

„Nei nei, þetta er ekki ásættanleg staða. Svona atvik eiga ekki að koma upp og við munum reyna að beita öllum ráðum til þess að þetta endurtaki sig ekki,“ segir Jón.