Kalt og vetraraðstæður á fjallvegum um allt land...

Kalt loft streymir yfir landið og nú í morgunsárið er víða ansi vetrarlegt um að litast, segir í athugasemd veðurfræðings á Veðurstofunni. Í dag verða norðaustan og norðan 8-15 metrar á sekúndu og allvíða snjókoma eða slydda, en hægari vindur sunnanlands fram eftir degi og skúrir eða él. Á vegum norðan- og austanlands má því víða búast við vetraraðstæðum, einkum á fjallvegum.

Það stendur heima. Meðal annars er krapi á Mosfellsheiði, hálkublettir á Hellisheiði og Sandskeiði. Þá er krapi víða á Vesturlandi, snjóþekja og skafrenningur á fjallvegum á Vestfjörðum en hálka eða snjóþekja víða í byggð. Sama er uppi á Norður- og Norðausturlandi, þar sem hálka eða hálkublettir eru á flestum leiðum.

Það dregur svo úr ofankomu í kvöld. Hægari norðlæg átt á morgun, en strekkingur austast á landinu fram eftir degi. Dálítil él á norðanverðu landinu með hita nálægt frostmarki, en sunnan heiða verður bjart að mestu og hiti 3 til 8 stig yfir daginn, en þar eru þó líkur á einhverjum síðdegisskúrum.