Þórólfur Guðnason segir upp störfum...

Þórólfur Guðnason sóttvarnalæknir hefur formlega sagt upp störfum, frá og með 1. september 2022. Þetta kemur fram á heimasíðu Embættis landlæknis en þar segir að ástæður uppsagnarinnar séu bæði persónulegar og faglegar. Þær séu helst að núverandi bylgja heimsfaraldurs Covid-19 sé að mestu yfirstaðin og nýr kafli að hefjast í starfsemi sóttvarnalæknis.

Í nýja kaflanum felist meðal annars uppgjör á viðbrögðum við Covid faraldrinum með það fyrir augum að bæta viðbrögð við faröldrum framtíðarinnar. Ásamt því að vinna við þau lögboðnu verkefni sem sóttvarnalækni er ætlað að sinna en hafa að miklu leyti fallið niður á tímum Covid-19.

„Þó að Ísland sé nú á góðum stað í Covid faraldrinum þá er honum hvergi lokið á heimsvísu og á meðan að svo er, þarf að fylgjast náið með tilkomu nýrra afbrigða veirunnar og hversu vel og lengi ónæmið sem einstaklingar hafa náð mun vara,“ segir í tilkynningunni.

„Að auki mun koma til lögskipaðra starfsloka sóttvarnalæknis á næsta ári er hann verður sjötugur.“

Þá segir að Embætti landlæknis muni auglýsa starf sóttvarnalæknis á næstu dögum.