Grunur um nýja bakteríu í hundi sem getur borist í menn...

Matvælastofnun hefur borist tilkynning um grun um bakteríusýkinguna brucella canis í hundi á Íslandi. Sýkingin getur smitast í menn, þótt það sé sjaldgæft, og börn, þungaðar konur og ónæmisbældir eru taldir vera í mestri hættu á alvarlegri sýkingu. Grunur um bakteríusýkinguna hefur ekki komið upp áður hér á landi.
Brucella canis er súna, en súna eru sjúkdómar kallaðir sem geta smitast á milli dýra og manna. Í tilkynningu frá Matvælastofnun segir að helstu einkenni sjúkdómsins hjá hundum sé fósturlát seint á meðgöngutíma, andvana eða veikburða hvolpar sem oft drepast fljótlega og bólgur í eistnalyppum hjá rökkum. Helsta smitleiðin milli dýra er pörun eða náið samneyti.

Sjaldgæft að fólk smitist

Sjaldgæft er að fólk smitist af brucella canis en einkenni geta verið hiti, hrollur, vanlíðan, lystarleysi, bein- eða vöðvaverkir og eitlastækkanir. Einkennin geta komið fram eftir nokkra daga eða jafnvel mánuði og börn yngri en 5 ára, ónæmisbældir einstaklingar og þungaðar konur eru talin vera í meiri hættu á alvarlegri sýkingu.

Helsta áhættan á smiti í fólk er frá vessum og vefjum við fæðingarhjálp hjá sýktum tíkum og því eru dýralæknar og hundaræktendur líklegastir að verða útsettir fyrir smiti. Sjúkdómurinn smitast almennt ekki milli manna.

Smitrakning og sóttkví

Aðgerðir vegna gruns um smit miða að því að koma í veg fyrir dreifingu sjúkdómsins á meðan beðið er eftrir staðfestingu greiningar, en tvær vikur geta liðið áður en endanleg niðurstaða liggur fyrir. „Gripið hefur verið til aðgerða svo sem tilmæla til viðeigandi aðila um heimasóttkví dýra og pörunarbann þar sem við á. Einnig er unnið að söfnun faraldsfræðilegra upplýsinga og sýnatökum,“ segir í tilkynningu Matvælastofnunar.

Matvælastofnun brýnir fyrir hundaræktendum að gæta fyllstu smitvarna við fæðingarhjálp hjá hundum og að hafa samband við dýralækni ef fósturlát verða seint á meðgöngu eða hvolpar fæðast andvana eða veikburða.